Berisha prek depozitat e shqiptarëve

Edi Rama e krahason situatën aktuale ekonomike me atë të kolapsit financiar të 1996. Ai tha gjatë një bisede me gazetarë se ashtu si në 1996 kur për shkak të shpenzimeve elektorale qeveria morri hua të papërballueshme nga tregu vendas, edhe sot, shpenzimet elektorale të 2009 e kanë vendosur qeverinë përballë një fature borxhesh të papërballueshme. Qeveria, tha Rama, sërish po rrit huamarrjen e brendshme në pamundësi për të mbledhur paratë nga sistemi i taksave, tatimeve e akcizave, i cili është në kolaps të plotë. Kryetari i PS e akuzoi qeverinë se po fut duart në depozitat e qytetarëve për të realizuar rritje pensionesh qesharake.

“Depozita, të cilat Sali Berisha po i përdor duke kërcënuar të fusë në kolaps sistemin që ushqen ekonominë, që stimulon sipërmarrjen, që mban gjallë ato vende pune që i krijon dhe i mundëson sipërmarrja, e cila nuk do të ketë mundësi të financohet nga bankat, që të gjitha po i çojnë në xhepin e qeverisë. Nga ky xhep po dalin depozitat e shqiptarëve që po u shkojnë familjeve në formë rritjeje pensionesh.”

Kryetari i Partisë Socialiste u ndal shkurtimisht edhe tek kriza politike në vend. Ai rikonfirmoi vullnetin e Partisë Socialiste për t’i shkuar deri në fund kauzës së transparencës dhe i bëri thirrje Sali Berishës të zgjidhë krizën.

“Nuk do të marrim pjesë në asnjë proces votimi për asnjë nisëm që vjen nga ky pushtet. Të cilin do ta përballim me të gjithë fuqinë e rezistencës sonë, në një betejë që do të përshkallëzohet përsëri e përsëri, deri kur Shqipëria të rivendoset në binarët e kushtetutshmërisë dhe të transparencës.” Rama deklaroi po ashtu se mbështet plotësisht vendimin e Grupit Parlamentar për të mos votuar asnjë ligj në Kuvend ...vijon në brendi