Shqiptarët varfërohen, Ministri i Ekonomisë fiton 1,8 milionë euro

Partia Socialiste e ka cilësuar si rast flagrant korruptiv fitimin prej 2,5 miliardë lekësh vetëm gjatë vitit të fundit, të Ministrit të Ekonomisë Dritan Prifti.

Situata bëhet edhe më alarmante duke patur parasysh faktin se viti në të cilin Ministri i Ekonomisë e ka shtuar pasurinë e tij personale me 2.5 miliardë lekë përkon me vitin më të vështirë për ekonominë e familjeve shqiptare.

Përmes deklaratave për shtyp dhe fjalimeve në Parlament, Partia Socialiste e ka akuzuar Ministrin Prifti për përfshirje në afera korruptive dhe u kërkoi organeve të drejtësisë të hetojnë mbi këtë pasurim të beftë të tij.

Partia Socialiste i hodhi poshtë pretendimet e ministrit se këto 1.8 milion euro ishin fituar nga shitja e aksioneve të tija në një kompani private, pasi ai nuk e kishte deklaruar pronësinë e tij mbi këtë kompani në deklarimet e mëparshme të pasurisë. Deputetët socialistë e akuzuan Ministrin Prifti për korrupsion dhe deklaruan se është e papranueshme që një ministër të mund të fitojë shuma të tilla në një vit të vetëm, i cili për më tepër ka qenë një vit krize ekonomike dhe mjaft i vështirë për familjet shqiptare.

PS u shpreh se është e turpshme që në një vit kur jetesa është bërë e papërballueshme si pasojë e rritjes së çmimeve të energjisë, ushqimeve, ilaçeve e gjithçkaje, tjetër, kur papunësia është në rritje dhe kur bizneset shqiptare po hasin në vështirësi shumë të mëdha financiare, Ministri i Ekonomisë gjen guximin të deklarojë se ka shitur për 1.8 milion euro një kompani fantazëm.

Gjatë debateve në Parlament deputetët socialistë i kërkuan sërish Priftit shpjegime në lidhje me pasurimin e tij. Deputeti Eltar Deda deklaroi se shuma prej 1.8 milion eurosh i ishte paguar Ministrit të Ekonomisë nga një kompani farmaceutike, Megafarma, e cila është në pronësi të kushëririt të kolegut tjetër të partisë së Dritan Priftit, Ministrit të Shëndetësisë Petrit Vasili.

Deputeti Deda deklaroi po ashtu se fakti që kompania Megafarma ka fituar tendera me vlerë prej miliona eurosh gjatë vitit të fundit, dhe fakti që i ka paguar 1.8 milion euro Dritan Priftit hedh hije të forta dyshimi mbi korrupsionin qeveritar të ministrave të LSI.

Partia Socialiste vazhdoi ta denoncojë këtë rast gjatë të gjithë javës që shkoi dhe ka deklaruar se do t’ i shkojë kësaj çështjeje deri në fund. PS u kërkoi po ashtu organeve të drejtësisë që të reagojnë duke hetuar pasurimin e ministrit, duke paralajmëruar se dështimi për të nisur një hetim mbi këtë rast do të ishte prova më e qartë e kapjes së shtetit dhe e degradimit të sistemit të drejtësisë në Shqipëri.