Paaftësia dhe babëzia e pushtetit po shkatërrojnë ekonominë

Gjatë bisedimit të tij të përjavshëm me gazetarët Kryetari i Partisë Socialiste Edi Rama foli mbi gjendjen e ekonomisë dhe raportin më të fundit të FMN për ekonominë shqiptare. Rama deklaroi se raporti, i përpiluar në një gjuhë diplomatike, ngrinte megjithatë alarmin mbi realitetin e ekonomisë shqiptare. Në raportin e saj, tha Rama, FMN në të njëjtën linjë me shqetësimet që ka ngritur në vijimësi Partia Socialiste flet mbi dobësitë strukturore të ekonomisë, mbi borxhin publik që po del jashtë kontrollit, mbi mungesën e hapësirës për politika fiskale që do të ndihmonin ekonominë dhe për pamundësinë e qeverisë për të vendosur nën kontroll politikën fiskale. Rama shtoi se sa më sipër, përbëjnë sfida të pamundura për qeverinë Berisha, sepse ajo vuan nga dy dobësi strukturore që nuk mund t’i adresojë: paaftësia dhe babëzia.

“Rasti i Dritan Priftit që pasurohet në mënyrë të paligjshme, por ndërkohë mban peng edhe kryeministrin edhe zv/kryeministrin, për të cilët sigurisht kryen shërbesat korruptive, në këmbim të përftimeve personale e përmbledh këtë në një shembull rrënqethës të të gjithë filozofisë qeverisëse të këtij koalicioni të paaftësh dhe të babëziturish.

Rasti i Arben Imamit që lëshon me një të rënë të lapsit gjithë çfarë ka mbetur nga pasuritë e ushtrisë për t’i hedhur në gropën thithëse të Dritan Priftit, i cili pastaj ua ndan sipas radhës familjarëve dhe klientëve të pushtetit, është një përshkallëzim i paaftësisë dhe i babëzisë në nivele të panjohura më parë, në publik të paktën. FMN-ja thotë se deri më sot shpenzimet nuk janë ulur dot edhe kur ka qenë tepër e qartë se të ardhurat kanë rënë ndjeshëm, po, dhe kjo është një plagë e rëndë që po thellohet dhe po përhapet përditë dhe që zanafillën vet e ka në maskaradën paraelektorale të vitit të shkuar, kur u bënë shpenzime jashtë çdo lloji mundësie për t’i mbështetur në të ardhura. Dhe kur u hap ajo gropë që sot është përditë e më e pranishme në jetën e çdo familje shqiptare. Si mos bien të ardhurat, kur e gjithë skema e qeverisjes është e korruptuar?! Madje më lejoni t’ju them që po mos t’ju rripeshin nga 7 lëkurë sipërmarrjeve shqiptare sot me gjoba skandaloze arbitrare mafioze, të ardhurat do të ishin edhe më keq.”

Kryetari Rama kritikoi ashpër po ashtu edhe borxhin publik që ka shkaktuar qeveria, çka përbën një rrezik serioz për konsolidimin fiskal të Shqipërisë dhe stabilitetin makro-ekonomik të vendit në tërësi: “Duke e mbyllur dua të them se në kuptimin më të thjeshtë të fjalës qeveria në fakt ka nënkontraktuar borxhin publik. Ka gjetur një zgjidhje origjinale si puna e piramidave për ta përballuar përgjegjësinë ndaj borxhit dhe detyrimet financiare që ka ndaj të tretëve. Borxhin afatmesëm ia ka lënë në kurriz të gjitha sipërmarrjeve vendase që kanë kontrata me shtetin duke iu thënë “ mbajeni se unë s’kam lekë”. Borxhin afatgjatë ua ka lënë në kurriz të gjithë shqiptarëve, dhe në radhë të parë fëmijëve të këtij vendi. Ndonëse në dukje kjo ngjan si e qëndrueshme, në fakt ky është i njëjti kurs filozofikisht si ai i kursit që çoi në ndërtimin dhe pastaj rrënimin e piramidave financiare.”

I pyetur në lidhje me ligjin për SHISH-in dhe nëse PS do të bashkojë votat më LSI e cila ka shprehur kundërshtimin e saj për këtë ligj, Rama deklaroi se PS nuk do të bashkojë votat me askënd, por do të votojë kundër ligjit sepse ai bie ndesh me interesat e Shqipërisë dhe të partnerëve të saj strategjikë NATO dhe SHBA ...vijon në brendi