Berisha, Hap kutitë ose largohu

Kryetari i Partisë Socialiste, Edi Rama, në një mbledhje të zgjeruar të Grupit Parlamentar, ku të pranishëm ishin edhe Sekretarët e Këshillave Socialistë të rretheve, prezantoi qëndrimin e opozitës mbi situatën politike në vend. Më poshtë, ju mund të lexoni fjalën e plotë të Edi Ramës. Mbrëmë Sali Berisha mbylli në mënyrën më të turpshme dhjetë ditët e kohës për reflektim që ne, e gjithë opozita shqiptare, i dhamë jo në emër të arsyes së forcës po të forcës së arsyes.

E quajti ultimatum. Vuri alarmin për rrëzimin e pushtetit me dhunë. Vendosi shenjën e barazimit mes opozitës dhe mafias.

Ngriti dorën ndaj nënës time, ndaj nënës së djalit tim dhe nënës së saj. Goditi rrethin tim familjar e miqësor. Pastaj edhe bashkëpunëtorin më të afërt në krye të partisë. Dhe në fund të dhjetë ditëve i’u kthye grupit të deputetëve, duke nxjerrë nga dollapi i armëve të vjetra të politikës së tij të përdalë një armë të stërpërdorur në vite, dosjen.

Ishin dhjetë ditë që e rinxorën në dritën e diellit fytyrën e gërdallës së mbushur me maraz e gëlbazë. Plot vraga mëkatesh të vjetra e të reja në dëm të këtij populli dhe shenja tërbimi të fshehur nën buzëqeshjen e shtirur. Por mbi të gjitha plot frikë. Një frikë e maskuar keq, me përsëritjen si në jerm të parullave për shtet të paepur e vullnet të hekurt, nga ato që diktatorët shqiptojnë rëndom duke trashur zërin kur ndjejnë tokën t’u lëvizë nën këmbë dhe pa e kuptuar janë bërë dordolecë që nuk trembin më askënd.

Sali Berisha doli nga roli që luante kur pa 100 mijë vetë në bulevard dhe kuptoi se çështja e kutive nuk ishte assesi një lojë brenda PS-së.

Ashtu siç kuptoi në netët e protestës stoike se loja e përçarjes së Partisë Socialiste kishte dështuar dhe të dështuara ishin edhe misionet e sekserëve me miliona nëpër qese për të blerë deputetët e Veriut.

Kuptoi më në fund se e vërteta e kutive të 28 qershorit nuk mund të asgjësohej më bashkë me kutitë dhe se opozita ka vendosur të sakrifikojë deri në fund, për t’i dhënë fund traditës së mbrapshtë të sakrifikimit të lirisë e ndershmërisë së zgjedhjeve në Shqipëri.

...vijon në brendi