Postuar më: 30/01/2012

Kryetari Edi Rama ka reaguar në lidhje me nisjen nga puna të Komisionit Hetimor për shkarkimin e zëvendëskryetarit të Këshillit të Lartë të Drejtësisë. Lideri i opozitës e ka cilësuar ngritjen e këtij komisioni si tregues të vazhdimit të barbarizmit të jetës parlamentare e demokratike nga ky pushtet.

“Komisioni ‘Spahiu’ vazhdë e barbarizmit të jetës parlamentare. Pushteti po provon përditë nevojën alarmante për ndryshim. PS e garanton ndryshimin”, shkroi Rama në faqen e tij zyrtare në Twitter.

Partia Socialiste që prej seancës së datës 26 janar ka bërë të ditur në Kuvend se nuk ka ndërmend të bëhet pjesë e luftës brenda llojit të palës tjetër. Duke folur në Kuvend Sekretari i Koordinimit Xhafaj u shpreh: “Komisioni dëshmon dhe njëherë përdorimin e parlamentit si një kamzhik politik, dëshmon shpërdorimin e tij si një element në funksion të interesave partiake dhe më në thelb akoma, shpërdorimin e tij në emër të interesave të një klani të ngushtë politik që kontroll pushtetin.”

Ashtu siç ishin deklaruar deputetët e Partisë Socialiste sot nuk u bënë pjesë e këtij komisioni.