-Bashkëbisedim i Kryetarit të PSSH Edi Rama me gazetarët pas zhvillimit të zgjedhjeve lokale 2023 dhe fitores së kandidatëve të Partisë Socialiste në shumicën e bashkive të vendit.

Kryetari i PSSH Edi Rama: Mirëmbrëma! Vendosa të bëj këtë konferencë shtypi sepse në një rast kaq të veçantë si ky nuk mund të bëja një fjalim fitoreje për një miting fitoreje!
Kjo është një fitore shumë e madhe për t’u festuar dhe unë vet ndihem shumë i vogël përballë hartës së mbushur me ngjyrat e fitores së kandidatëve tanë nga Tropoja në Konispol.

Kam dhe besoj kemi të gjithë nevojë të ruhemi nga era e fortë dehëse e një fitoreje si kjo.

Unë e kam të nevojshme të shkoj sa më shpejtë në Shkodër për të nisur nga qyteti më i bekuar nga Zoti dhe më i keqtrajtuar nga robi një tur falënderimi në gjithë Shqipërinë. Nuk duhet të harrojë askush se këto ishin zgjedhje vendore patjetër me një dimension politik të imponuar nga hijet e të shkuarës që tentuat ta tërhiqnin përsëri këtë vend mbrapa dhe i shikonin këto zgjedhje si aksion revolucionar drejt përmbysjes së qeverisë, por tanimë që shqiptarët i zgjodhën ata që dëshironin, ne do të vazhdojmë pa humbur kohë punët që u ngadalësuan nga fushata, jo vetëm në nivelin vendor, por edhe në nivelin e qeverisjes qendrore.

Ndërkohë një grup pune do të përgatisë një raport të detajuar të leximit të votës mbi të cilin do të nisim punën për më tej. Natyrisht që nuk dua t’i ngrij askujt buzëqeshjen legjitime të fitoreve të arritura me aq shumë mund dhe me aq shumë punë dhe durim, prandaj dua që të gjithë ta dinë krye bashkiakët tanë të rizgjedhur apo të zgjedhur rishtas, deputetet tanë, drejtuesit politik pa diskutim në radhë të parë se iu jam tejet falënderues për përpjekjet e tyre dhe jam admirues për arritjet e tyre.

Edhe më falënderues u jam socialistëve të bazës, anëtarëve të përkushtuar të familjes tonë politike, të cilët u angazhuan si gjithmonë me mish dhe me shpirt në gjithë territorin.

Pa diskutim patronazhistëve të palodhur dhe aktivistëve të paepur pa të cilët makinerisë sonë elektorale do t’i mungonin shumë kuaj fuqi, që ndihmojnë në krijimin e atyre distancave të riparueshme nga kundërshtarët. Si dhe falënderues i jam skuadrës sonë fantastike të sondazheve, statistikave, të trendeve historike, të dhënave nga terreni në kohë reale dhe projeksioneve të bëra në bazë algoritmesh shkencore, por patjetër që falënderimi i falënderimeve i shkon zgjedhësve tanë nga Thethi deri në Finiq të cilët na dëgjuan, na besuan dhe na votuan përsëri, ose për herë të parë si votues të parë apo si votues deri dje demokrat.
Ndërkohë që, dua të falënderoj nga zemra edhe çdo zgjedhës të djathtë sado qofshin, një për një, nga ata që e dëgjuan mesazhin tim për të mos dalë fare në votime nëse e kishin të pamundur ta kapërcenin ylberin politik. U jam mirënjohës edhe atyre sepse me mungesën e tyre iu bashkuan Shqipërisë krenare, dinjitoze, mike, aleate e palëkundur e Shteteve të Bashkuara dhe e botës demokratike. Të tjerëve, atyre që këtë herë nuk ja dolën që të dalin nga këneta e hijeve të së shkuarës iu uroj shumë që rezultati t’ju ketë shërbyer të shohin më mirë se në atë kënetë nuk ka të ardhme, por ka vetëm të shkuar dhe patjetër që garantoj ata zgjedhës që ashtu siç pa diskutim të gjithë zgjedhësit tanë, se ne do të angazhohemi si asnjëherë më parë, do të gjejmë si asnjëherë më parë fuqinë dhe energji të reja për t’i qëndruar kësaj sfide të jashtëzakonshme që na bënë duke na dhënë një besim kaq të madh.
Për mua ky rezultat është një mesazh i jashtëzakonshëm për tu lexuar jo për tu festuar. Prandaj do angazhohem ta bëj këtë duke nisur me turin e falënderimeve dhe me shkrimin e projektit të ri të PS drejtë Shqipërisë 2030. Mu duk më e udhës që për të mos e lënë kaq shkurt, t’ju ftoja dhe ju në falënderimin për 48 orët që keni kaluar në të shumtën e kohës këtu në këmbë dhe pa gjumë për të ndihmuar informimin e teleshikuesve dhe në respekt të këtij mundi, po e ndaj me ju këtë fund të kësaj maratone për sa më takon.

-Zoti Rama, kam disa pyetje. Si do t’i vlerësoni ju standardet e zgjedhjeve? Si e lexuat ju raportin paraprak të ODIHR? Akuzat e opozitës? A keni përgjigje dhe për to? Pyetja tjetër lidhet me një fitore dhe me një humbje. Për kë kishit besuar më shumë, tek fitorja e Shkodrës apo humbja e Himarës. Pyetja e fundit pikërisht për Himarën, duke patur parasysh që kandidati fitues është i arrestuar. A mendoni që mund të shkohet drejt zgjedhjeve të pjesshme në Himarë? A e mendoni, e shpresoni?

Kryetari i PSSH Edi Rama: Përsa i përket standardit të zgjedhjeve, nuk kam lexuar asnjë raport paraprak për hir të vërtetës, por besoj që zgjedhjet nuk kanë pasur asgjë të veçantë në asnjë aspekt përveç dështimit spektakolar të KQZ-së për të garantuar fillimin në kohë të votimit në mbi 500 qendra për mijëra e mijëra qytetarë, që me korrektesë dhe dëshirë, që në orët e para të mëngjesit ishin futur në radhë për të ushtruar të drejtën dhe detyrën e tyre kushtetuese.

Kjo ishte një gjë e rëndë, tronditëse për faktin se pajisjet elektronike të identifikimit kanë garantuar një transparencë shumë më të madhe, një siguri shumë më të madhe dhe mosfunksionimi i tyre për arsye nga më banalet, ndërkohë që, dakord KQZ-ja është për të bërë shumë gjëra para dhe pas, por KQZ-ja në fund të ditës është për atë ditë. Vërtetë është i pafalshëm dhe i pajustifikueshëm, por nuk dua të ndalem me tutje në këtë. Me siguri që ne nuk do ta lëmë me kaq këtë çështje, aq më tepër kur pamë skenat e tmerrshme të atyre pajisjeve që hidheshin si arka bosh, sepse asnjë arkë me çfarëdo gjëje të mbajë brenda, nuk mund të hidhet ashtu në kamion për të shkuar në destinacion.

Miliona e miliona euro të vëna në dispozicion nga taksat e shqiptarëve për të garantuar shqiptarët për një proces më të sigurt, më transparent dhe më të mirë zgjedhor, kjo ishte vetmja gjë e veçantë. Të tjerat janë të gjitha gjëra që i kemi dëgjuar.

Përsa i përket akuzave të opozitës, ju nuk keni nevojë të më pyesni sot; ju keni sinkronet, unë e kam parashikuar disa herë në takimet e mia publike. E vetmja gjë, që unë nuk parashikova ishte shpejtësia me të cilën u kthye në atë që është pozicioni i përhershëm, historik, i përjetshëm i tyre, mohimi i realitetit dhe fillimi i klithmave për vjedhje të zgjedhjeve ndërkohë që, deri sa dolën rezultatet e para, sidomos rezultati i Kamzës, ata ishin, si gjithmonë edhe në të shkuarën, të sigurt që kishin një fitore tronditëse.

Cfarë mund të them unë më shumë për ta?

Sa i përket çështjes së Himarës, dua të jem shumë i qartë. Së pari, dua të respektoj zgjedhjet në Greqi dhe të mirëkuptoj inflamimin e retorikës, duke u përpjekur për sa më shumë urtësi dhe vetëpërmbajtje nga ana ime dhe nga ana jonë sepse kemi bërë një punë të jashtëzakonshme, së bashku me qeverinë greke, me Kryeministrin Mitsotakis, me ministrin e jashtëm Dendias për të ngritur një urë të re të madhe, të gjerë dhe të fortë bashkëpunimi dhe për ta çuar në një nivel tjetër marrëdhënies mes Shqipërisë dhe Greqisë dhe unë nga ana ime jam i vendosur të bëj maksimumin përpara sesa të jem i detyruar të reagoj profesionalisht.

Dua, po ashtu, me këtë rast të theksoj se institucionet e drejtësisë në Shqipëri mund të kenë të metat e tyre, mund të kenë problemet e tyre, por askush, që nga unë i pari, që ju jeni dëshmitarë që nuk i kam kontestuar asnjëherë vendimet e tyre e jo më pastaj të tjerë, e lëre pastaj nga jashtë Shqipërisë të vë në pikëpyetje dhe nën presion rolin e tyre.

Dua po ashtu të kujtoj se dy apo tre ditë përpara regjistrimit të kandidatëve, Prokuroria në bashkëpunim me Policinë e Shtetit, kanë arrestuar një kryetar bashkie dhe kandidat me shumë gjasë të Partisë Socialiste. Po, në Bulqizë, për një çështje dhe me një akuzë që unë akoma sot nuk e njoh në thelb se ccfarë është. As nuk më ka shkuar mendja që të ngre zërin dhe t’i kërkoj Prokurorisë, Gjykatës të nxjerrë provat se kështu dua unë dhe kur dua unë, as nuk më ka shkuar mendja të vë në diskutim punën dhe rolin e tyre dhe as më shkon mendja ta bëj këtë gjë dhe unë besoj që nuk ka asnjë mundësi që ne të pajtohemi me idenë që ka një drejtësi tjetër për qytetarët e Republikës së Shqipërisë me kombësi shqiptare dhe ka një drejtësi tjetër për qytetarët e Republikës së Shqipërisë me kombësi greke. Është e njëjta drejtësi, nuk janë dy drejtësi. E thashë, me të metat dhe me barrën e tyre.

Kështu që, kam dëgjuar shumë dhe praktikisht, kam preferuar të mos flas dhe nuk do flas deri në mbarimin e zgjedhjeve në Greqi, lidhur me këtë, duke shpresuar që pas zgjedhjeve në Greqi do ketë dialog dhe jo deklarata, të cilat i kam dëgjuar të bëhen, jo vetëm nga përfaqësues të qeverisë greke, por dhe nga parti politike të opozitës, parti simotra, si Siriza apo PASOK-u.

Keqardhje e madhe sepse unë besoj që minoriteti grek nuk është mish për topat elektoral të askujt, as në Shqipëri, as në Greqi. Megjithatë, këtu ndalem në këtë pjesë.

Në aspektin tjetër, dua të them që zgjedhjet në Himarë kanë treguar, në fakt, diçka krejt tjetër, që fatkeqësisht askush do që ta vërë re. Ato janë zhvilluar me qetësi të plotë, aty është votuar pa asnjë pengesë, pa asnjë incident, aty kanë qenë përfaqësues të trupit diplomatik me të drejtën e tyre si vëzhgues, aty kanë qenë gazetarë nga të gjitha mediat shqiptare dhe greke, aty ka qenë një lider lokal, i cili ka mbajtur televizionet gjallë me bomba tymuese për atë çka po ndodhte, por që askush nuk po e shihte askund.
Aty kanë qenë dhe forcat e policisë që kanë garantuar gatishmëri për çdo rast dhe aty është bërë një numërim si kudo në Shqipëri, transparent, paqësor, pa asnjë problem. Dhe në fund fare aty ka fituar me një grusht votash, por nuk ka rëndësi një grusht votash apo një votë e vetme bëjnë dallimin, kandidati kundërshtar me qeverinë. Kjo hedh poshtë totalisht çdo lloj argumenti të sforcuar se aty është bërë përpjekje për të marrë me metoda ekstra ligjore dhe ekstra elektorale nga ana jonë një fitore, e cila nuk ka të bëjë fare me masën e dhënë nga gjykata me kërkesën e prokurorisë për kandidatin në fjalë.
Unë besoj se duhet të mjaftojë ky argument për të mos ngatërruar gjërat. E drejta për t’u zgjedhur e për të zgjedhur në Shqipëri është e garantuar për të gjithë, por nuk ka dy drejtësi. Akuza e ngritur, nuk është ngritur nga qeveria. Ju e dini shumë mirë se sa e kontrolloj unë dhe sa e kontrollon qeveria ime prokurorinë dhe sa dëshirë kemi dhe kam unë që ta kontrolloj. Zero! Ndërkohë që, absolutisht, nëse unë vetë si kryeministër i vendit, nuk e bëj kurrë që të ngre pikëpyetje pa u shprehur drejtësia apo që t’i bëj presjon drejtësisë, këtë nuk e lejoj dhe s’kam për ta lejuar ta bëjë askush tjetër. Kjo duhet të jetë shumë e qartë.

Pastaj, si do të shkojë procesi, çfarë do të dalë nga procesi, kjo është diçka që unë e di po aq sa ju dhe po aq sa të gjithë ata që s’dinë asgjë, sepse realisht, kjo është një çështje që tanimë ka kaluar në prokurorinë speciale për vetë faktin që subjekti është subjekt i prokurorisë speciale dhe do të trajtohet nga gjykata speciale. Kjo është e gjitha!

-Zoti kryeministër, cili do të jetë raporti juaj me ata kryetarë bashkie që janë përfaqësues të koalicionit “Bashkë Fitojmë” dhe që kanë fituar, të paktën sipas rezultateve paraprake. A do të mbani raport me to? Do e mbani premtimin tuaj që nuk do bashkëpunoni me ta që dhatë gjatë fushatës.

Kryetari i PSSH Edi Rama: Më vjen shumë keq që ju përsërisni gabim diçka që unë e kam sqaruar sa herë jam pyetur. Diçka që unë e kam sqaruar në çdo herë që kam folur për këtë temë. Bashkëpunimi me ta është i pamundur, jo për shkakun tim, por për shkak të tyre. Këtë tregon eksperienca. Natyrisht që kjo është diçka që ne do ta shikojmë rast pas rasti. Nëse do të ketë kryetar bashkish që do të jenë proaktiv, do të vënë interesat e komunitetit mbi agjendat politike dhe do të duan të bashkëpunojnë me qeverinë si partnerë në shërbim të komunitetit, ne nuk kemi asnjë problem me këtë. Dhe përkundrazi, ne e kemi për detyrë dhe e kemi privilegj t’i shërbejmë çdo anëtari të bashkësisë sonë në të 28 mijë km katrorë të Shqipërisë.

Zoti Rama, për të vazhduar paksa dhe pyetjen e kolegut. Është një kryebashkiak i ri i sapozgjedhur që ju ka bërë ftesën, i Mirëditës, ndoshta për të pirë një kafe me të dhe në bazë të tekstit që ai ka shkruar në Facebook, ka thënë që të vijoni dhe investimet dhe ndoshta dhe bashkëpunimin me këtë kryebashkiak. Do ta vijoni?

Kryetari i PSSH Edi Rama: Nuk jam në dijeni të kësaj ftese për kafe, por përpara se të vij te kafja me të, kam shumë takime për të bërë. Duke filluar nga Shkodra. Nesër duhet të nisem për Samitin e Liderëve të Këshillit të Europës në Islandë dhe sapo të kthehem nga Samiti, do të nis me turin e falenderimeve nga Shkodra ku jam shumë i vendosur që të bëj një histori të re dhe jam i bindur që ne mund të bëjmë një histori të re në Shkodër. Në shumë dimesione. Shkodra, e kam thënë prej kohësh, e kam thënë dhe gjatë fushatës, e përsëris tani që zgjedhjet kanë mbaruar dhe ne kemi marrë një fitore që është shumë barrë e madhe për mua dhe për ne, është qyteti dhe zona më e bekuar e Shqipërisë. Nuk ka asnjë të dytë! Mbase edhe në Europë nuk ka një qytet tjetër që ka atë bekim me lumin, me liqenin, me detin, me kodrat, me malin dhe me alpet mbi kokë. Dhe është bashkia më e prapambetur dhe problematike e Shqipërisë. Ne tani duhet të bëjmë jo atë që kemi thënë, po do bëjmë edhe më shumë seç kemi thënë sepse Shkodra na dha jo një shans, po një besim shumë të fortë dhe unë jam i bindur që ky është një besim shumë i fortë që mund të kthehet në një kohë, jo shumë të gjatë në një mosbesim shumë të madh nëse ne nuk jemi në lartësinë e kësaj sfide.

Unë i bëra një sfidë Shkodrës disa herë. Dështova disa herë. Këtë herë Shkodra më ka bërë mua dhe na ka bërë ne një sfidë më të madhe se të gjitha sfidat që ne i bëmë të marra sëbashku.

Kështu që, Shkodra është kryefjala e mandatit që sapo do të nisë pas disa muajsh. Padiskutim, kjo nuk i heq asgjë angazhimit tim për Durrësin. Durrësi është një potencial strategjik i jashtëzakonshëm për Shqipërinë e 2030-tës. Në Durrës do të ndërtojmë disa vepra që nuk janë vetëm të Durrësit. Janë vepra që i përkasin ekonomisë, tregtisë, turizmit të rajonit dhe më gjerë. As nuk diskutohet që dhe të tjerat me radhë. Pra, për kryebashkiakun e Mirditës, ka kohë.

Megjithëse një numër të konsiderueshëm bashkish të fituara, unë po ndalem te qarku i Beratit pasi aty gjithmonë socialistët kanë marrë mbështetje maksimale, konkretisht në Kuçovë. Fitorja për Partinë Socialiste ishte në një rezultat shumë të ngushtë. Ku gabuan socialistët aty pasi gjithë këto vite, Partia Socialiste në Kuçovë ka marrë mbështetje maksimale?

Kryetari i PSSH Edi Rama: Nuk kam të dhëna të kësaj natyre. Janë të gjitha analiza për t’u bërë në nivelin vendor. Janë analiza për t’u bërë në nivelin e qarkut. Janë analiza që kërkojnë një lexim shumë të kujdesshëm. Për këtë arsye, edhe çunat dhe gocat fantastikë të skuadrës tonë të sondazheve, do të fillojnë nga puna që javën e ardhshme, menjëherë, për të organizuar një grup sondazhesh post-elektorale për të kuptuar se çfarë mund të mësojmë më shumë nga zgjedhësit pasi ata janë shprehur. Ne e bëjmë këtë praktikë gjithmonë dhe na jep shumë informacion. Por, ajo që dua të them është që zgjedhjet kanë funksionuar në të dyja nivelet.
Dy mesazhe ju kam përcjellë unë shqiptarëve. Njëri, zgjidhni njeriun që do të merrni në punë për katër vite, tjetri, hiquni faqes së zeze dhe kanë funksionuar të dyja.
-Pyetja që ndoshta sot të gjithë e kanë bërë pasi kanë parë edhe rezultatet finale. Si arritët ta merrnit Shkodrën dhe është e vetmja bashki që ju keni reaguar ditën e sotme. Mjafton vetëm emri i Benet Becit apo u deshën edhe votat e ish-deputetit socialist, ish-aleatit tuaj Tom Doshi?

Kryetari i PSSH Edi Rama: E thashë dhe një herë tjetër, ne nuk kemi të dhëna të detajuara për të lexuar të gjithë elementët, do t’i mbledhim, do t’i lexojmë me kujdes, por këto të gjiha janë gurë të një mozaiku shumë më të madh, unë besoj që ne Shkodrën e kemi marrë si përgjegjësi se s’kemi marrë asgjë se Shkodra është aty dhe do të jetë aty. Kryeministrat venë e vijnë sado të gjatë që të jenë. Shkodra ka qenë dhe është aty, kështu që s’kemi marrë asgjë ne, po kemi marrë përgjegjësinë që na e kanë hedhur si një përgjëgjësi alla shkodrançe. Shkodranët nuk janë dalluar asnjëherë për t’i bërë gjërat gjirokastritshe, i kanë bërë gjërat gjitihmonë me gjithësej, kështu që në gjithsej na kanë hedhur një top që ne duhet të jemi të zotë ta kapim dhe ta çojmë aty ku duhet.

-Himara u nda me 19 vota diferenca, ju e njihni rezultatin final për bashkinë Himarës apo do të ushtroni dhe të drejtën që keni si parti politike për ta kontestuar rezultatin? Apo do ia lini drejtësisë drejtimin e kësaj bashkie?

Kryetari i PSSH Edi Rama: Unë nuk kam të dhëna për probleme, përtej problemit të problemeve që është blerja e votave nga kandidati që u ndalua nga drejtësia. Ky është i vetmi problem dhe ky është kryeproblemi për të cilin drejtësia duhet të flasë sepse nëse drejtësia ka prova bindëse, atëherë sigurisht që rezultati vihet në pikëpyetje, por në vetvete nuk shoh arsye për të kontestuar rezultatin sepse siç thashë, gjithçka u zhvillua në transparencë të plotë. Duhet të mësohemi që transparencën ta pëlqejmë edhe kur fitojmë dhe kur humbasim.

-Sërish tek Fredi Beleri. Do lini drejtësinë të flasë deri në fund, me një vendim të formës së prerë apo do të veproni siç keni bërë me disa kryebashkiakë tuajët, të cilët qysh kur janë arrestuar kanë patur një masë sigurie për një akuzë të caktuar dhe ju i keni shkarkuar sipas kompetencave që ju jep ligji.

Kryetari i PSSH Edi Rama: Së pari njëherë unë besoj që nuk është Himara kryetema dhe nuk ia vlen të shpenzojmë gjithë këtë bashkëbisedim me Himarën. Rasti i Himarës është shumë i qartë. Zgjedhjet janë zhvlluar në mënyrë më të lirë, më të drejtë, më transparente. Njëri prej kandidatëve ka një problem të hapur me drejtësinë.

Këto të dyja. Për të parën, ne kemi pjesën tonë të përgjegjësisë dhe besoj e kemi ushtruar me përgjegjëshmëri, me urtësi, me maturi, me durim maksimal. Parafytyroni vetëm kaq, që në Himarë nuk kemi çuar as edhe një person nga qendra. Edhe drejtuesi politik i qarkut të Vlorë nuk ka qëndruar aty për të bërë markimin e atij liderit lokal që përmbyti mediat edhe shpërndau gjithandej toksinat e një situte imagjinare presionesh me mjete, me xhama të zinj, me njerëz e syze, me dopio xham të zi, e kështu me radhë, asnjë person. S’ka patur asnjë përplasje, asnjë debat. S’ka pasur asnjë gjë fare dhe kjo besoj është pamja e qartë e përgjegjshmërisë sonë, drejtësia është diçka tjetër.

-Zoti Rama Shkodra ju votëbesoi, a keni ju projekte konkrete në letër për Shkodrën për të ndikuar në zhvillimin ekonomik dhe social të saj?

Kryetari i PSSH Edi Rama: Me gjithë respektin, nuk mendoj se është dita për të folur për projekte ekonomike dhe sociale për Shkodrën. Sigurisht qe ne kemi disa projekte, por do duhen dhe disa projekte, por ndërkohë ajo që unë besoj që është më e rëndësishmja, është leximi i këtij mesazhi të jashtëzakonshëm dhe nuk është një mesazh i jashtëzakonshëm vetëm për PS sipas meje, as për mua personalisht, është edhe për ju, sipas meje, për mediat domethënë, është edhe natyrisht për opozitën, është për të gjithë ata, që kanë një rol dhe një zë publik me siguri, sepse flet për diçka vërtetë shumë spektakolare që ka ndodhur dhe unë do isha naiv ose do isha mëndjelehtë, dritëshkurtër, brutal nëse këtë spektakël do ta konsideroja një spektakël të triumfit të PS. Jo. Ky spektakël është shumë më tepër se kaq dhe edhe për ne ka brenda pjesën e vet shpërblyese, se natyrisht nuk e fsheh dot kurrë dhe s’kam pse ta fsheh se në një ndeshje futesh për të fituar dhe fitorja është shumë e ëmbël, ndërkohë që humbja është shumë e hidhur, fitorja është një problem shumë i madh moral, por ka dhe pjesën e vet që duhet lexuar me shumë, shumë kujdes sepse është një mesazh shprese, pritshmërie shumë të lartë gjë që na ka shoqëruar ne në fakt qysh në mandatin e parë.

Në vazhdimësi ne kemi hasur në pakënaqësi, kemi pasur momente rënieje serioze të mbështetjes së opninioni public, por asnjëherë deri tani njerëzit nuk kanë diskutuar në fund të ditës së të vetmit që mund ta çojnë këtë vend vetëm përpara jemi ne dhe ky nuk është slogan, është realitet, prandaj slogani ka pasur efekt, kështu që ne duhet të bëjmë një punë serioze për ta kuptuar mirë këtë gjë dhe më besoni që kënaqësia dhe ajo adrenalina e ngjyrave që filluan të mbushin ekranet, ka zgjatur shumë pak. Pastaj më ka filluar një tjetër proces dhe për këtë arsye do të bëjmë dhe turin e falenderimeve, dhe për këtë arsye do të përpiqemi të veprojmë në drejtime të ndryshme sepse nëse duam të mbajmë këtë ritëm dhe të bëjmë gjërat siç duhet, nuk duhet të përsërisim të njëjtat gjëra, por duhet të bëjmë gjëra të reja.

Ka ndodhur një gjë e re dhe një gjë e re për një parti që po hyn ose po bën 10 vjet në qeveri shtatorin që vjen për pak muaj dhe ky është problem shumë i madh, por njërkohësiht edhe një barrë shumë, shumë e rëndë, që e marim me shumë kënaqësi, që të mos krijojmë gabimisht idenë që po them pse na i dhatë gjithë këto. Edhe më shumë të na kishit dhënë edhe më shumë do kishim marrë , që të jem i sinqertë deri në fund.

-Zoti Rama, numri i votuesve që do të votonin për herë të parë në këto zgjedhje ishte 122 mijë, në fakt nga të dhënat e KQZ janë vetëm 14 mijë 18-vjeçarë që kanë shprehur vullnetin e tyre politik. A është kjo një e dhënë që krijon perceptimin që të rinjtë nuk i vjelin frytet politikës apo nuk kanë besim tek politikanët e së tashmes?

Kryetari i PSSH Edi Rama: Janë detaje me të cilat unë nuk jam i njohur dhe aq më tepër të komentoj, por që nga eksperienca e zgjedhjeve këtu në këtë sallën tonë kompjuterike, ne jemi nuk e di se sa vjet para KQZ-së, kështu që, po nuk i kam parë të gjihta të dhënat. Kemi të dhëna për të gjitha po s’i kam parë.

-Në ditët e fundit të fushatës elektorale ju keni deklaruar e opozita po bënte presion ndaj qytetarëve dhe po blinte vota. Si ka mundësi që opozita blen vota dhe ju fitoni zgjedhjet?

Kryetari i PSSH Edi Rama: Në kujtesën time s’jam marrë fare me këtë çështje.

– Jo, përkundrazi jeni marrë dhe po marr një deklaratë të fundit në Vaun e Dejës ku i bënit thirrje Zef Hilës kandidatit të Bashkisë dhe i bënit thirrje të mos bënte atë që po bënte pjesa tjetër dhe të shpërndante lek, duke nënkuptuar kështu që opozita po blinte vota. Dhe pyetja ime është, nëse opozita ka blerë vota, ka ushtruar presion ndaj votuesve atëherë si ka mundësi që zgjedhjet i fitoni ju?

Kryetari i PSSH Edi Rama: Nuk e kujtoj këtë detaj, është e vërtetë, por diçka, është një informacion që e kemi pasur dhe përderisa ishte dhe një shqetësim i madh i njerëzve në Vaun e Dejës unë e thashë publikisht, në këtë rast që tregtari më i madh i votave në Shqipëri është në rrugën e lirisë, këtë e di gjithë Shqipëria. Madje unë jam i bindur që nëse do gjenit një mënyrë t’i drejtoheshin peshqve të liqenit artificial do t’iu thoshin me emër, me mbiemër se kush është. Mos të bëjmë tani humor se e dimë të vërtetën, por këto historitë me blerje dhe me hakera janë bërë aq bajate sa unë nuk dua të merrem fare me to. Kjo është një përpjekje aq e marrë dhe në aq shumë vite për të mohuar realitetin saqë është besoj unë, shkaku kryesor pse ata bien po në atë gropë dhe bien dhe më thellë sepse të përsërisësh të njëjtën gjë duke shpresuar në rezultat tjetër, është marrëzi.
Kështu që, s’kam unë asnjë dëshirë dhe asnjë nevojë e asnjë gramë energji që të merrem tani “jo kush i bleu jo kush nuk i bleu”. Sondazhet nuk blihen, e kam thënë një mijë herë, sondazhet nuk blihen. Sepse çdo kush mund të bëjë sondazhe. Nëse ti mendon se sondazhet e 7 televizioneve janë të blera, ti mund të besh sondazhin tënd si radio ose si ku di unë. Çdokush mund të bëjë sondazhe. Unë nuk kam parë deri më sot qysh nga viti 2007, unë nuk e kam parë akoma një sondazh që i nxjerr ata përpara, unë personalisht, por nëse kjo nuk mjafton, nuk ka një mënyrë tjetër për të thënë ‘I’m sorry”, ne vazhdojmë të bëjmë punë tonë.

– Edhe një pyetje tjetër. Ju deklaruat se nuk keni kontroll në Prokurori por në fakt përgjimet për blerjen e votës në rastin e kandidatit të Himarës dolën disa ditë pas sulmeve tuaja publike dhe gjithashtu prokuroria dhe policia veproi dy dite para zgjedhjeve. Pyetja ime është, nëse ju vërtetë nuk e keni nën kontroll drejtësinë atëherë si ka mundësi që me këto përgjime, kandidati i opozitës arrestohet, ndërkohë që dy përfaqësues të lartë të PS Damian Gjiknuri dhe Ulsi Manja që kanë dalë në përgjime për blerjen e votës sot ishin sërish këtu si drejtues politik duke festuar fitoren e radhës?

Kryetari i PSSH Edi Rama: Ky quhet silogjizëm ekstravagant sepse nuk kanë asnjë lidhje rastet me njëri tjetrin. Në përgjim mund të dalë kushdo duke folur çfarë të dojë, por tjetër është që ti të dalësh në përgjim duke folur, tjetër është që ti të provohesh që gjërat që ti ke folur janë përkthyer në akte të caktuara. Kështu që, për më tepër pastaj, ato përgjime të cilave ju referoheni, nuk kanë fare asgjë që përbën indicje të qarë lidhur me këtë. Fare! Zero! Ky është silogjizëm ekstravagant!

– Këto indicje provojnë përdorimin e administratës për shkak se zoti Gjiknuri në atë kohë ka qenë ministër dhe thoshte që do ta bënte ‘’tërmet’’ Dibrën dhe në fakt ashtu e bëri, siç bëri Elbasanin, apo jo zoti kryeministër? Ato provojnë diçka që në raportin e OSBE-së, sot ka qenë shqetësim i madh dhe ka qenë presioni ndaj administratës publike dhe përdorimi që i është bërë administratës publike në zgjedhje. Po për këto jeni të shqetësuar?

Kryetari i PSSH Edi Rama: Raportet e OSBE-së OHDIR, sidomos parapraket, këtë nuk e kam ndjekur, nuk japin opinione të autorëve të raporteve, po reflektojnë opinione të të gjitha palëve. Ka pasur shqetësime. Po ka pasur sepse u bënë ditë tani që po i dëgjojmë shqetësimet. E shprehura nga kush? Nga po ata që këto shqetësime i kanë shprehur gjithmonë pasi janë ballafaquar me humbje. Ka pasur shqetësime, patjetër ka pasur. Ka pasur pretendime, sigurisht. Po çështja është nga këto te provat dhe te shprehja e autorëve të raportit, është një hendek shumë i madh.
Ka pasur shqetësime, e dimë që ka pasur. Edhe ju keni pasur shqetësime, po, patjetër. Po pastaj? Ato reflektohen në raportin paraprak, pastaj merren, studiohen, përpunohen e të tjerë, por që këto zgjedhje janë sheshit me të vërtetën e tyre dhe që e vërteta e këtyre zgjedhjeve është që ne kemi marrë një besim shumë të madh me një mbështetje si asnjë herë tjetër një forcë politike në qeveri, mbase edhe në opozitë. Ta diskutosh këtë mund ta bësh sepse çdo njeri është i lirë ta bëjë, por do të thotë të jetosh në mohim të realitetit. Zgjedhje është dhe kjo. Mohimi i realitetit dhe fantazitë.

– Do ta merrnit këtë mbështetje nëse nuk do të kishit për 10 vite pushtetin, do kishit këtë mbështetje kaq të fortë?

Kryetari i PSSH Edi Rama: Kjo nuk ishte pyetja. Kjo është një pyetje tjetër të cilës do i përgjigjem që kam qenë në opozitë dhe kemi mundur një pushtet që i kishte të gjitha. Kështu që, mos u mërzisni. Sa më shumë dhe sa më mirë ta lexojmë këtë që ka ndodhur, secili për pjesën e vetë, kuptohet, por unë ju ftoj ta bëni dhe ju, ta bëjnë të gjithë, aq më shumë mund të mësojmë, realisht. Dhe nëse ka një dallim ndër shumë dallime mes nesh dhe atyre që humbasin sa herë përballen me ne, është se ne nxjerrim gjithmonë mësime dhe se ne menjëherë pas çdo zgjedhje bëjmë punën për të kuptuar çfarë këto zgjedhje na kanë treguar dhe çfarë mund të mësojmë nga këto zgjedhje dhe pastaj si të përmirësojmë makinerinë.
Çfarë të të them unë tani?! Red bull-i është Red Bull dhe ato makinat që ngelen rrugës, janë makina që ngelen rrugës. Çfarë të të them unë tani?! Si ta zgjidhim këtë punë?!

-Zoti kryeministër, gjatë ditës së sotme, zonja Glover dhe misioni vëzhgues i OSBE/ODIHR ka shprehur shqetësimin për një nga sloganet tuaja gjatë fushatës, që ka të bëjë faktin që ju i jeni drejtuar qytetarëve, nëse nuk votoni Partinë Socialiste, mos dilni fare në zgjedhje. Ndërkohë që, edhe përdorimi i burimeve shtetërore, sipas misionit të OSBE/ODIHR është një tjetër shqetësim i ngritur, çka ka qenë në sinkron edhe me Partinë Demokratike që gjatë ditës së djeshme kanë denoncuar disa raste ku, sipas tyre, përfaqësues të administratës kanë marrë pjesë në qendrat e votimit, duke ndikuar drejtpërdrejtë tek qytetarët. Keni një përgjigje për këtë?

Kryetari i PSSH Edi Rama: Për të thënë të vërtetën, nuk mund të komentoj komente të komenteve sepse nuk e kam ndjekur dhe për më tepër nuk do ta komentoja kurrë Misionin dhe zonjën Glover në kushtet kur kemi mundësi të komunikojmë drejtpërdrejtë dhe t’i bëjmë komentet me ta, por eksperienca ime më ka mësuar që me raportet e OSBE/ODIHR dhe me konferencat e misionit të OSBE/ODIHR bëhet gatimi sipas kuzhinave përkatëse dhe firmës së kuzhinave i mesazhit për opinionin publik. Kështu që, unë i kam thënë zgjedhësve të djathtë që nuk e kapërcejnë dot ylberin politik, që të mos dalin fare dhe nuk e kuptoj ku është problemi këtu. Nuk kam parë ndonjëherë ndonjë lider politik ose ndonjë politikan në garë që të dalë dhe të inkurajojë zgjedhësit e krahut tjetër që të shkojnë të votojnë.
Secili inkurajon zgjedhësit e krahut të vet dhe dekurajon zgjedhësit e krahut tjetër me strategjinë që zgjedh, me gjuhën që zgjedh, me momentin që zgjedh, me teknikën e komunikimin.

Rezultati besoj që na jep të drejtë dhe në fund të fundit, politika është garë dhe në garë hyhet për të fituar dhe fitorja është fitore dhe humbja është humbje. Pastaj, sigurisht ka raporte, ka komente e i ka të gjitha.

-Për herë të parë, në parlament përfaqësuat qarkun e Vlorës, ndërkohë tani qarkun e Durrësit.

Kryetari i PSSH Edi Rama: Jam i të dyjave unë.

-Në parlament përfaqësoni qarkun e Durrësit zyrtarisht, nuk mund t’i mbani të dyja.

Kryetari i PSSH Edi Rama: Jam i të dyjave, jam zgjedhur tek të dyja.

-Në 2025, keni menduar të përfaqësoni qarkun e Shkodrës?

Kryetari i PSSH Edi Rama: Do doja shumë, por vetëm nëse do krijoja idenë që e meritoj. Në qoftëse nuk e krijoj idenë që e meritoj mbështetjen e tyre, vështirë se do ta marr përsipër që të ballafaqohem me ta, por do luftoj shumë dhe do punoj shumë që në 2025 t’ia bëj këtë, t’i jap këtë kënaqësi gjyshes time shkodrane, e cila më ka dhënë një pjesë të rëndësishme të atyre gjërave që më kanë bërë ky që jam.

Ju falenderoj shumë!

Dua, edhe njëherë, të shfrytëzoj rastin të falenderoj të gjithë. Shpresoj që të mos kem lënë mangut asnjeri. Ndërkohë që, patjetër, kanë qenë spektakolare ato që kanë ndodhur në Tropojë, në Kukës nuk diskutohet. Në Dibër, në gjithë qarkun e Dibrës, një arritje shumë domethënëse. Pa diskutim, ka qenë shumë domethënë ajo që ka ndodhur në qarkun e Lezhës, posaçërisht në bashkinë e Lezhës, por dhe në bashkinë e Kurbinit ku është bërë një punë e jashtëzakonshme, është bërë praktikisht një qytet i ri dhe ku kryetares së bashkisë i është dhënë një vlerësim.

Padiskutim Durrësi. Kur thonin “Edi Rama shkon në Durrës se aty kanë probleme me rezultatin”. Në fakt jo, Durrësi është baza e pashfrytëzuar e ekonomisë së re shqiptare dhe prandaj unë kam menduar qysh ditën e parë të kësaj fushate se Durrësi është vendi nga ku këtë herë i duhet folur gjithë Shqipërisë dhe Durrësi rezonon në gjithë Shqipërinë dhe Shqipëria duhet të rezonojë gjithmonë e më shumë me Durrësin, deri kur të arrihet në bashkimin e të dyjave dhe të kemi metropolin Tiranë-Durrës, që do vijë shpejt, besoj edhe një dekadë.

Pa diskutim që kanë qenë disa rezultate shumë domethënëse edhe në vende të tjera.

Devolli është një rezultat shumë kuptimplotë, Pogradeci ka marrë rezultat të jashtëzakonshëm. Më ka pëlqyer posaçërisht rezultati i Skraparit, pastaj me radhë të gjitha.

Një gjë e fundit, një detaj sepse është një detaj nga shumë që jam duke i parë. Ka pasur një përgjigje interesante dhe nga Lazarati për mesazhin tim për të mos shkuar. Në Lazarat rezultati është domethënës në favor të kundërshtarëve, por edhe rënia e atyre që kanë shkuar nuk është pa domethënie kështu që, pjesë e turit tim do jetë patjetër dhe Lazarati për të folur, për të biseduar, për të kuptuar.

Këtu mbaron biseda ime për zgjedhjet. Nuk kam më asnjë bisedë për të bërë për zgjedhjet dhe nuk kam më asnjë dëshirë që të qëndroj në ballin e luftës politike.

Hyra në ballë të luftës politike me fillimin e fushatës. Tani dal nga balli dhe vazhdoj me punët e tjera sepse pjesën e luftës, të përplasjeve dhe të gjithë ngarkesave që duhen mbajtur në këtë aspekt, parlamenti dhe kacafytjet duhet ta bëjnë ata që janë më të rinj se unë, me në krye Elisën.

Unë jam për të bërë punë të tjera.

Faleminderit!